Til hamingju Obama!

Já, í nótt varð það ljóst að Barack Obama hafði hlotið næga kjörmenn til þess að geta myndað ríkisstjórn og orðið valdamesti maður heims. En hann fékk 349 kjörmenn á móti 162 kjörmönnum McCain sem að ég tel að sé alveg ágætisrúst en til þess að vera öruggur með forsetaembættið þarftu að vera með 270 kjörmenn. Ekki spyrja mig meira útí hvernig þetta kjörmannakerfi virkar – ég veit það ekki nægilega vel sjálfur!

Lokaræður beggja frambjóðenda voru svakalega góðar að mínu mati, jafnvel þó að gríðarlegur munur hafi verið á tilefnum ræðanna en auðvitað hélt Obama sigurræðu á meðan að McCain varð að halda tapræðu. 

Ræða Obama var að ég held að megi segja mjög söguleg en hann vitnaði mikið í hina táknrænu kveðjuræðu dr. Martin Luther King sem hann hélt kvöldið fyrir lát sitt fyrir fjórum áratugum. Það er ekkert óeðlilegt, Obama hefur gert það áður en svo er hann líka að ná gríðarlegum áfanga, sem að ég held að flestalla blökkumenn hafi dreymt um síðan að þeir urðu að halda áfram með réttindabaráttu sína án King. Í ræðunni var Obama hættur að tala sem frambjóðandi og talaði hann sem þjóðhöfðingi um framtíðina nú þegar að hann hefur tryggt þær breytingar sem að hann hefur barist fyrir.

Sigur Obama var sögulegur að öllu leyti.  Ríkin Indiana, Colorado, Virginía og Norður-Karolína féllu öll hans megin í þessum kosningum – en þau hafa verið ríki Repúblikana síðustu áratugina. Svo fóru tvö ein mikilvægustu ríkin til Obama, Ohio og Flórída, – en þess er gamans að geta að sá sem hefur unnið í Ohio í kosningunum hingaðtil hefur alltaf komist í forsetaembættið. Eins og fyrr segir er Obama engin breyting þar á. Pennsylvanía var mjög mikilvægt ríki að þessu sinni og hafði McCain vonast til þess að geta unnið í því og þannig komist í forsetaembættið einhvernveginn(til þess þurfti náttúrulega allt að ganga upp) – en því miður fyrir McCain að þá tók Obama það líka – og það með meiri mun en nokkurn hafði órað fyrir.

Sumir halda kannski að Obama sé nú þegar orðinn forseti en það er ekki raunin. Eftir 76 daga sver hann sig í embætti og getur þá hafist handa við þær breytingar sem að hann boðaði. Þangað til hefur elskan okkar George Bush ennþá völdin og getur gert allan þann óskunda sem að honum sýnist. Annars verður Obama að sjálfsögðu ekkert í fríi þessa 76 daga, hann verður…eða þ.e.a.s ætti að vera á fullu spani við það að skipa embættismenn nýrrar ríkisstjórnar sinnar og fyrst og fremst að koma með hugmyndir sínar og tillögur til þeirra breytinga sem hann byggði kosningabaráttu sína á.

Demókratar hafa traustan þingmeirihluta í báðum deildum og styrktu þá báða frá eftirminnilegum sigri 2006 og nú þegar að forsetinn er líka Demókrati – hafa þeir öll tækifæri til þess að láta verkin tala. Enginn Bush fyrir lengur.

Væntingarnar eru gífurlegar til Obama. Kjósendur kusu hann á grundvelli breytinga og ættum við að sjá stefnu hans og ríkisstjórnar hans mótast á næstu 176 dögum – en það verður ákaflega áhugavert að sjá hvort að Obama geti staðið undir þessu öllu. Þjóð hans í tveimur stríðum – fjármálakreppa skekur heiminn – virðing alheimsins fyrir Bandaríkjamönnum í algjöru lágmarki(þó svo að hún hafi án efa hækkað eftir þessi úrslit) og vandamálin halda áfram. Verður gaman núna að sjá hvort að Obama verði í rauninni góður forseti, því að hann er einfaldlega óskrifað blað.

Oddur Ævar – 10.HH

Sarah Palin fæddist árið 1964, hefur verið ríkisstjóri Alaska síðan í desember 2006 og er núna orðin varaforsetaefni John McCain. Byrjum aðeins á að fara í gegnum líf Söruh fram að þessum tímapunkti.

Hún fæddist í ríkinu Idaho í Bandaríkjunum, en fjölskylda hennar flutti snemma til Alaska. Palin var þekkt fyrir að vera ótrúleg íþróttamanneskja og keppti hún fyrir lið síns bæjar í körfubolta og var stundum kölluð “Sarah Barracuda” fyrir ákafan leik sinn, en Barracuda eru fljótir og hættulegir ránfiskar. Palin náði líka langt í fegurðasamkeppnum og komst í annað sæti í Ungfrú Alaska en fyrir þann árangur fékk hún skólastyrk sem hún notaði til þess að koma sér í viðskiptanám.

Pólítískur ferill Palin:

Árið 1992 gaf Palin kost á sér til setu í bæjarráði heimabæjar síns og studdi hún þar umdeildan söluskatt, en lofaði jafnframt “öruggari og skilvirkari bæ”. Hún vann og komst í borgarráð og var svo endurkosin þremur árum seinna – eða árið 1995. Ári síðar ákvað Palin að gefa kost á sér til bæjarstjóra og sigraði, en í kosningabaráttu sinni sakaði hún andstæðing sinn um að hafa sóað peningum skattborgara í óþarfa og að hafa sett fáránlega háa skatta á bæjarbúa. Sem bæjarstjóri gerði hún góða hluti, lækkaði meðal annars sín eigin laun og lækkaði skatta almennings. Eftir tvö ár í embætti mátti Palin ekki bjóða sig fram aftur.

Eftir það tilnefndi þáverandi ríkisstjóri hana í olíuráð og tók hún við þeirri tilnefningu. Hún var þar í nokkur ár en að lokum sagði hún upp í mótmælaskyni vegna þess að henni fannst örla á spillingu í ráðinu. Árið 2006 tókst henni svo að fá tilnefningu Repúblikana til þess að bjóða sig fram sem ríkisstjóri Alaska og lýsti hún því yfir að öryggi almennings, samgöngur og menntun væru hennar helstu stefnumál. Hún sigraði þá enn einar kosningarnar og tókst henni að vinna þessar með 8% mun á milli hennar og andstæðings hennar. Hún varð því bæði fyrsti kvenkyns ríkisstjóri Alaska og sá yngsti í sögunni. Og það er hún enn í dag, við ágætis vinsældir íbúa í Alaska, en hugsanlega verður hún orðin varaforseti þessa eina stórveldis í heiminum í nóvember næstkomandi.

Pólítískar skoðanir Söruh Palin:

Sarah Palin er mjög íhaldssamur stjórnmálamaður, en hún er á móti fóstureyðingum og jafnframt styður hún skotvopnaeign, sem að allmargir Bandaríkjamenn ættu að vera ánægðir með. Andstaðan við fóstureyðingar mun örugglega auka fylgi þeirra McCain meðal kaþólskra í Bandaríkjunum, en það er talsverður fjöldi af kaþólikkum í Bandaríkjunum.

Umfjöllun fjölmiðla um Palin:

Þessi grein sýnir að ég hef frekar jákvætt viðhorf gagnvart Söruh Palin, þó svo að í Bandarísku blaði myndi þetta ekki verða samþykkt akkúrat núna, en þeir hafa verið óvægir við að grafa upp hluti úr fortíð hennar sem að, ég veit satt best að sega ekki hvort sumir séu sannir eður ei. Þar hafa þeir sagt fréttir þess efnis að Sarah hafi t.d verið meðlimur í Sjálfstæðishreyfingu Alaska á tíunda áratugnum, en sá flokkur berst fyrir sjálfstæði Alaska. Svo hafa líka komið fréttir af óléttu 17 ára gamallri dóttur Palin, en það telst vera svolítill skandall.

Af hverju valdi John McCain Söruh Palin sem varaforsetaefni?

Án efa eru nokkrar ástæður fyrir þessu vali hjá McCain. Sjálfur veit ég ekki nákvæmlega af hverju hann ákvað að gera það, en Palin hefur reynst frábær sem bæði bæjarstjóri og ríkisstjóri, þó ekki sé hægt að bera þau embætti saman við varaforsetaembættið. McCain hefur sjálfur lýst því yfir að hann og Palin séu að hans mati mjög svipaðir stjórnmálamenn, en það er líklegast ein af ástæðunum fyrir því að hann ákvað að velja hana. Margir tala svo líka um að þarna sé kominn Ameríski draumurinn í hnotskurn: McCain gamall hermaður úr Víetnam stríðinu og svo Palin fyrrverandi fegurðardrottning.  Takk fyrir mig.

Oddur Ævar  – 10.H.H